حجاية ماما الغولة

حجاية الغولة وكلتنا قمولا

لموضوع	تراث شفهي مغربي
صنف	حجايات
لعنوان	ماما الغولة
المنطقة	اقليم صفرو، قبيلة بنيازغة
الرمز لمغربي MM	mm6960

حاجيتكوم ماجيتكوم، كان فواحد لبلاد بعيدة واحد الصياد عندو سبعة دلبنات. مات مرتو وتزوج مرا تانية. لمرا التانية قالتلو هاد لبنات تايكلو بزاف ونا باغا انعمل ولادي، لبقاو هنا شي نهار ياكلوني وياكلو ولادي، شوف شي حل ليهوم جليهوم فالغابة ولا نمشي لحبابي. تافق معاها غايمشي يصيد فالغابة ويديهوم معاه ويتلفهوم. داكشي لي كان فالصبح فيقهوم بكري فاليهوم رانا غادي نصيد وغانديكوم معايا باش تفوجو معايا، لبنات فرحو من غير ختهوم لكبيرة لي سمعاتو تيهضر مع مراتو. إيوا ملي كانو خارجين، لبنت لكبيرة عمرات جيابها بالطحين، وفينما تتزيد شوية تترمي شوية دالطحين باش تعلم الطريق. وبقا غادي غادي غادي بيهوم يدورهوم من هنا ويردهوم من هنا .. تا وصلو الغابة. ملي وصلو الغابة قالهوم تسناوني هنا نمشي نصب لمنادف ورا ديك لكدية. مشا لورا لكدية وهوم بقاو يتسناو دازت ساعة، جوج، ستة دالسوايع وباهوم مارجعش، بدات الضلمة اطيح، قالتلهوم ختهوم لكبيرة يالله نرجعو راه يكون نسانا هنا، ماقالتليهوم لحقيقة بلي راه باغي يجليهوم باش ماتخلعهومش. وبدات تتقلب عل العلامات دالطحين لي دارت فالطريق .. تا وصلو للدار .. لقاو باهوم گالس مع مرتو وفرحان والقدرة تيطيبو فيها سبعة دالحجلات لي صيد .. طارو عل دوك الحجلات كان فيهوم الجوع كل وحدة خدات حجلة وخلاو باهوم ومرتو بلا عشا. إيوا لمرا ناضت تتجمع شطايطها تمشي لدار باها.. وهو يرغب فيها، وقاليها غدا نبعدهوم فالغابة مايعرفو منين ايرجعو…

لغد ليه فيقهوم تاني بكري وقاليهوم ياللهو معيا نصيدو … دخلات لخوت لكبيرة لخيامة وعمرات جيوبها بالفول. وبدات فينما مشات شي مسافة تترمي فولة .. ختها الصغيرة كانت وراها ضرها الجوع فالطريق بدات تتلقط داك لفول وتتاكلو. تاني ملي بعدهوم فالغابة قاليهوم تسناوني نمشي ننصب لمنادف فالجهة لخرا ماغانتعطلش عليكوم. تاني مارجعش وبقاو يتسنا، تا عياو، قالت ليهوم الخوت لكبيرة يالله نرجعو للدار راه نسانا تاني … ملي بدات تقلب عل لعلامات لي دارت فالطريق مالقاتهومش حيت ختها الصغيرة كلات دوك الفولات … باقو غادين بان ليهوم الضو فواحد جهة مشاو ليه مايلقاوه غا الغار دالغولة، ختهوم لكبيرة غا شافت الغولة مشات عندها ورضعات منها وقالت لخواتتها يرضعو منها .. لغولة قالت ليهوم دابا نتوما بناتي ملي رضعتو مني ماغانكلكومش، ولكن بشرط غا تفليو لي لقمول ديالي وتاكلوهوم تا ننعس. سولوها معاياش تتنعس، قالت ليهوم انا ماتنعس تا تيهرنق لحمار فالبحر يعني معطلة.

بقاو تيفليو لقمول وياكلهوم، وشافو عندها شي كمامس فواحد لقنت سولوها عليهوم، قالت ليهوم ديك لكموسة الصفرة لحليتها تتجي الشتا ولكموسة البيضة لحليتها تيطيح التبروري والكومسة الخضرا تنطيح بها التلج. مشا لحال وهوم تيفليو وياكلو، وبدات الغولة يترخاو عضامها ونعسات، هي هاديك ناضت ختهوم لكبيرة خدات دوك الكموسات وقالت ليهوم يالله نوضو نهربو. خرجو من غار الغولة وبداو ايجريو وغا لخلا والقيفار، ماكاين تاحد يسولوه عل الطريق كاينة غا الگمرة والنجوم، وبداو ايسولو الگمرة.

“الگميرة تشطح والنجيمات تردح، اشدارت ماما الغولة فنعاسها؟”،

قالت ليهوم هربو هربو راه تتململ فالفراش، زادو فالجري حسو بلعيا وقفو يرتاحو وتاني سولو الگمرة:

“الگميرة تشطح والنجيمات تردح، اشدارت ماما الغولة فنعاسها؟”

قالت ليهوم هربو هربو راها خارجة تابعاكوم، وهوم يحلو لكموسة دالشتا وكملو هاربين. تاني سولو لگمرة

“الگميرة تشطح والنجيمات تردح، اشدارت ماما الغولة؟”

قالت ليهوم هربو هربو، راها رجعات تنشف حوايجها وخارجة تابعاكوم … وبقاو ايهربو ويسولو الگمرة ويحلو لكموسات دالتبروري والثلج تا بعدو عل غار الغولة وصلو الواد الخالي. گلسو يرتاحو حدا الواد الخالي، وشربو وغسلو وجوهوم ويديهوم وكملو الطريق. شوية ختهوم الصغيرة تفكرات نسات خلخالها عند الواد الخالي ملي كانت تغسل رجليها وبقات تبكي وقالت ليهوم نرجعو ناخدوه. قالو ليها رجعي وحدك، لكموسات تسالاو لينا ولرجعنا تشدنا الغولة وتوكلنا قمولا. البنت راسها قاصح، قالت ليهوم سيرو انا نرجع ناخد الخلخال ونلحق عليكوم.

ملي رجعات وصلات الواد الخالي لقات مسدودو بمزيودو، قاليها اش جايا تعملي هنا؟ وعاودات لو لحكاية كاملة، مسدودو عجباتو لحكاية، وقال مع راسو غانستعملها نسعا بها. قالها لبغيتي الغولة ماتكلكش غانديرك فمزيودي وملي نغزك بلمسلة بقاي تعاودي:

“كنا بسبعة بينا
و جلانا بابانا
مشينا لغولة
و كلتنا قمولا
مشينا للواد الخالي
نسيت خلخالي
رجعت نجيبو
وجبرت مسدودو
وعملني في مزويدو
بابانا بابانا يا لعدو
يا تلاف اولادو
على سبعة د الحجلات”

شدها ودارها فالمزود وبقا ايدور من دوار لدوار ومن مدينة لمدينة ويدور عل الديور وملي تينغزها بلمسلة تتبقا تعاود قصتها والناس تيعجبهوم داكشي وتيدورو معاه. تا لواحد النهار مشا لواحد الدار وخرجت ليه واحد لمرا نغز بالمسلة وبدات تحكي:

ديك لمرا ماكانت غا ختها لكبيرة وفهمات لحكاية وعرفات بلي هاديك ختها الصغيرة. قالتلو آسي مسدودو تكون عيتي دخل ترتاح وتاكول وتنعس وكمل طريقك غدا، الليل ماوراه ربح. مسدودو عجبو لحال، قالتلو ارا لمزيود نعلقو فالخيامة يكون تقيل عليك، مسدودو عل نيتو عطاها لمزود، وكلا ورتاح ونعس، مشات حلات لمزود وخرجات ختها من لمزود وقالت ليها سكتي وعمرات المزود بمش وفروج ومناصب. الصبح مسدودو خدا لمزيود وخرج، وصل لواحد الدار وهو ينغز لمزود وخرج لفروج نقب ليه عينيه ولمش قمش ليه لوجه ولمناصب هرسو ليه راسو ومات مسدودو.

ومشات حجايتنا مع الواد وهوما ياكلو لحديد وحنا ناكلو التريد.

QR، كود حجاية ماما الغولة