حجاية لغولة ولحطاب

الرمز المختصر للمعلومة فقاعدة البيانات MM8392







جداية لغولة ولحطاب

لموضوعتراث شفهي مغربي
صنفحجايات
لعنوانلغولة ولحطاب
المنطقة
الرمز لمغربي MMmm8392

حاجيتكوم ماجيتكوم.

قاليك، اسيدي بن حنيني، كان فواحد لعروبية بعيدة، فيها غا لخلا والقيفار. ساكن واحد لحطاب مسكين وفقير وعندو عشرة دلولاد، حمسة بنات وحمسة ولاد. كان يفيق بكري كل نهار ويمشي لغابة تيحطب الشجر ويمشي لمدينة تيبيعو لفران لحومة ويشري داكشي لي باش يعول ولادو ومرتو. هكدا ديما كل نهار، يحطب يمشي للسوق، يبيع لحطب ويشري داكشي لي يخص عل قلتو. تا لواحد النهار وهو يحطب ويصرب بالشاقور هاك بلاك فالجدر دواحد الشجرة، سمع واحد الصوت. دار ولقا واحد لمرا، سوالتو، اشتدير اسيدي؟ قالها تنحطب. سولاتو، واش تدير بيه؟ تنجمع لحطب وتنمشي نبيعو وتنتقدا لولاي ومرتي. قالتو شحال عندك دلولاد؟ قاليها عندي عشرة، خمسة ولاد وخمسة بنات. سولاتو وكيفاش تتعيشهوم ولحطب قليل ومافيه فلوس، تا لحطابة كتارو خلاوها عل لغابة. قالها لحمدو الله عايشين وخلاص. هنا لغولة قالتلو، واشنو رايك تجي نتا ولادك وتسكنو معايا ونعطيكوم خروف فالنهار ونتا ترتاح ولادك يعيشو مزيان. لحطاب فرح، ومشا عند مرتو قالها جمعي راسك وجمعي لولاد وتبعيني راه الله عفا علينا من لمزيرية. سولاتو اشنو واقع؟ قاليها واحد لمرا لقاتني فالغابة طلباتني نعيشو معاها وتعطينا خروف فالنهار، ماباقينش نجوعو، وماباغا منا والو غا نونسوها.

هي هاديك لمرا جمعات لحصيرات لي عندهوم وشطايطهوم، دارو الدراري الصغار فالعينين دالشواري د الحمار ولي تيقدرو يمشيو تبعوهوم عل رجليهوم، تا وصلو لدار ديك لمرا. غا وصلو قالت ليهوم ها الخروف دبحو وسلخو، وكولو الراس والكرشة ولكرعين فالغدا والباقي لعشا ولفطور. وها الزريبة كل نهار خود حولي، غا واحد فالنهار رانا حاسباهوم.

بقا لحطاب وولادو هكاك كل نهار تيدبحو خروف. جات واحد النهار ديك لمرا اطل عليهوم وتسول عل حالهوم، قالت ليها مرت لحطاب راه طلع لينا اللحم فالراس بغينا ناكلو عديسة وخبز كيموالفين، ولبغيتي ملي نطيبو ندوقك منو. وافقات لمرا، وداكشي لي كاين قلبات مرت لحطاب فداك الدهاز لي جابو نهار تحولو لقات واحد لكموسة دالعدس، نقاتها وطيباتها وملي وجدات صافطات بنتها لكبير بواحد الكاسرونة دالعدس لعند لمرا لي مسكناهوم. خدات الدرية لكاسرونة وطلعات فواحد الكدية لفين ساكنة لمرا.

غا وصلات لباب بانت ليها لمرا معلقة واحد الراجل وتتاكول فيه. غا شافت داكشي غوتات وطاحت. سمعتها لمرا وخرجات قالت ليها مالك تتغوت، البنت خافت قالت ليها غا عترت وطاحت ليا لكاسرونة دالعدس وخفت لضربني مي. قالت ليها ماشفتي تا حاجة خرا. جاوباتها لا بعويناتي لي ياكلهوم الدود ماشفت شي حاجة. رجعات لبنت وقالت لمها شنو شافت. تخلعات مها وغوتات عل راجلها لي كان معرگها كرشة وبولفاف، قالتو نوض نهربو هادي راها ماشي مرة عادية، هادي راها الغولة.

الراجل ماتسوقش ليها ونهض فيها، قاليها غا كليتي لعدس وتفكرتي لفقر لي كنا فيه، وحسدتيني حيث وليت مرتاح. وكمل نعاسو. جمعات لمرا ولادها وبناتها وهربات بيهوم لدوارها. ملي فاق لحطاب ومالقاش ولادو ومرتو سحاب ليه كلاتهوم الغولة، شوية وهو يسمعها جاية وهو يتخزن فالخابية. دخلات الغولة ومالقاتهومش، وبدات تتغوت وتقول وهي معصبة، علفتهوم وسمنتهوم ويقولبوني. ومن الزعاف ضربات ديك الخابية بيديها وهي تهرس ويبان لحطاب. قالتلو لولاد لي فتيين وسمانين هربتيهوم ونتا بقيت هنا اشارف الهارف، كيفاش غاناكلوك. قالها بدا بوديناتي لي ماسمعوش لمراتي. وهي تحيد ليه لودنين وكلاتهوم. تاني سولاتو، شنو ناكول تاني ودنيك يالله هروني فالمصران. قاليها خودي رجيلاتي لي بقاو ناعسين وماتبعوش مراتي. وهي تاكول ليه رجليه. وبقا هكاك كل مرة تسولو شنو تاكول، تا كلاتو كامل.

ومشات حجايتنا مع الواد وهوما ياكلو لحديد وحنا ناكلو التريد.

QR، كود حجاية لغولة ولحطاب

QR، كود حجاية لغولة ولحطاب
تعليق الفايس بوك
hespress
Author: hespress

كلشي عل المغرب




About hespress 8478 Articles
كلشي عل المغرب

قم بكتابة اول تعليق

Leave a Reply

لن يتم نشر بريدك الالكتروني في اللعن


*