كلمات قصيدة الطنجية للشيخ مويجو
العنوان | الطنجية |
كلمات: | الشيخ مويجو |
الحان | الشيخ مويجو |
غناء | الشيخ مويجو |
التاريخ | |
الرمز المغربي MM | mm6737 |
اعيدو بالله من الشيطان
واش هادا حيوان
من غير لي كل
گاليك عطيوني الطنجية
سمعو يا اخوان
مانحلفلكوم بايمان
عمري ماحلفت
ولكدوب ما عزيز عليا
كل من سمعها يبقا دهشان
يبرق في لعيان
كان كدبتوني
سولو مرتي السعدية
اولاهي كترو لفلوس
وزاغ لانسان
نساو صنايع زمان
الي كان باه حمال
ولا يبيع العطرية
انا خوكوم روافجي فنان
مشهور فالبلدان
آح عل الرابوز
ادا ايطيح فيديا
انبطنو بالبطاين عل للوان
الروح من عود البان
انتحفو بشي مسمار
رايقة دهبية
ليوم ضهر شنيول
صنع مريكان
ماكيطلعو دخان
مايحتاجو رابوز
وصنعتي مشات فالخطية
خممت وقلت اعبد الرحمان
راه السوق ولا عيان
نوض دبر شي حرفة
ونشوف مايليق بيا
مشيت وكريت واحد لمگازان
درت بابها ريسطوران
شريت الطواجن وقدور
والجفنات من الطينية
دبحت من لغلمي جوج دالخرفان
من الدكور لمزيان
ووجدت خيرات الله
للناس تبيع عليا
كريت گارسون
بهجاوي عگزان
بحالي مبلي بالكسيان
ومعاوناه الطباخة
هي مرتي السعدية
قول اعود بالله من الشيطان
اواش هدا حيوان
آ من غير لي كل
گاليك عطيوني الطنجية
بسم الله قلت
افتاح البيبان
آ رحيم الرحمان
ارزقني اسيدي ربي
فهاد الصبحية
رفعت عيني شفت
واحد لانسان
جاي لعندي زربان
يضهر لي من دكالة
وجعافرو ملوية
ولا من عفاريت
سيدنا سليمان
ولا عنترة بن شداد
جاني وتسلط عليا
ولد لحرام داير
بروحو شبعان
ادمي وحشمان
تقول عمرو ماكل
باش يلقا ديك النية
بدا كيمشق وهو زعفان
قلت واولاهي كليان
صافطهولي ربي
باش نخلف هاد لخطية
گعد فلارض وقال
شد البيبان
ليضربوني بعيان
ارالي ماناكول
وحسب كل ماعطيت ليا
بدا ياكول وهو لهفان
ماطاحولو لضغان
بدا يمضغ من
الصبح تا لعشوية
اعود بالله من الشيطان
اواش هاد حيوان
من غير لي كل
گاليك وجدو لي الطنجية
بدا اسيدي ب مية دالبتيبان
و ستين دالقطبان
جوج دداج مسلوقين
ووحدة مقلية
طنجرة داللحم
غا طراف دالشمال
وعشرة دالكرعان
الكرشة ولمصران
وزاد حتا الرية
الگارسون ايسربيه
وبقا دهشان
گال ولاهي كليان
يا لطيف واش هدا سبع
ولا لبية
طنجرة دلحريرة
بالجلايف وحفران
كيسرط وزربان
جوج قصاري ديكسكسو
طالعين بالعلوية
كل بيبي مسلوق
ولاخور مطيب بلملوخية
سطل دالشراب
وباقي ماسكران
يگرگب فلكيسان
قال سقيني باباك
مال عينيك خارجة فيا
صندوق كوكا كولا
وباقي عطشان
تقول يسقي لغصان
يعطي لگليبو
ودموعو مجرية
كرش هادي عندو
ولا ماگازان
ولا روايد الكيران
آ لي دكرتو كان كلو
غير مع الصبحية
اعيدو بالله من الشيطان
اواش هادا حيوان
آمن غير لي كل
گاليك عطيوني الطنجية
شلل فمو وقالك
جيبو لي لفيان
شجيرة دالبنان
شلا دالباكور
وستين دالهندية
عشرين الدلاح
وشواري دالرمان
عشرة كيلو دالقسطان
هربت انا من حداه
خوفت ليكمل بيا
طلب حلوة بالزبيب وجلجلان
ولغربية بالشمال
لمخرقة بالعسل
ومعاهوم الشباكية
جبنالو صينية
بالبراد وكيسان
وجبنة داللبان
من الصبح وهو
ياكل تا العشوية
نگول هاد لكيف
كتامي مزيان
او طلع فالدخان
فكرني فالرابوز
قلت هو لي يليق بيا
كرش هادي عندو
ولا لگار دالتران
ولا خزانة ميريكان
آ لي دكرتو كامل
دخل في كرشو لمخلية
اعودو بالله من الشيطان
اواش هادا حيوان
من غير لي كل
گاليك طبخو لي الطنجية
وقت لخلاص جا
مول الريسطوران
اونطق بالتمن
صابو كل مليون
ومية الف و سبعمية
غير ايخلص ولا
يرفعوه السجان
وصاحبنا سكران
قالي ايلا بغيتو لخلاص
صبرو عليا
لعام جاي نشاعلاه
نخلف لكوم بعشان
وجدو لي الطوال
ولا نحلف بلي
نتوم تتكدبو عليا
خلانا نهضرو
وفر يا اخوان
آ يضرب فالطرقان
فات الستيام والتران
بمشية رجلية
بمية فالساعة
ودخل لتطوان
وصاحبنا عيان
وقاليهوم وجدو لي
نتعشا بالطنجية
اعودو بالله من الشيطان
اواش هادا حيوان
آ من غير لي كل
گاليك عطيوني الطنجية
سمع لاغنية الطنجية عل موقع لمغرب للفيديوهات
QR، كلمات قصيدة الطنجية
QR، كلمات قصيدة الطنجية |
قم بكتابة اول تعليق