كلمات اغنية كان ياما كان لعبد الوهاب الدكالي

كلمات اغنية كان ياما كان نضم محمد الباتولي

العنوان	كان يا ماكان
الكاتب	محمد الباتولي
اللحن	عبد الوهاب الدكالي
غناء	عبد الوهاب الدكالي
الرمز المغربي MM	mm1395

كان يا ما كان
كان ياما كان
حكاية ترويها العجايز للصبيان
قبل ما تنام.. يغنيها راوي
امام الزمان..
بادي الكلام بكان ياما كان

كان يا ما كان
أنا وحبيبي عاشقين الاثنين
نرعى الغنم عايشين هانيين
فوق المرج الاخضر
بالليل نباتوا ساهرين
نغنيو ونحلم
فالصبح نخرجو متعانقين
نحلمو بموسم الحصاد
نديرو عرس ونولدو اولاد
هاكدا حلمنا كان يكبر.. وكان يا ما كان

وفيوم من الايام
ولد شيخ البلاد
على جوادو كان هواد
شاف غزالي ف الواد
خطفها وزاد
خلا دمعي عليها هواد
ما قدرت عليها نصبر
فليلة الفرح تألم قلبي
وسال الجرح وكان اللي كان

وقبل ما يطل الصبح
ويبان ضو الفجر
تسللت للقصر
وخطفت البدر
ناوي بغزالي نهرب
لكن السور كان عالي
ولما قفز جوادي عثر
شافونا الأهالي
وتفضح السر
فديك الليلة
تجمعت القبيلة
ف ديك الليلة
حكمت القبيلة
أنا والخليلة نترجمو بالحجر
بين يوم وليلة
تنفذ الأمر وماتوا العاشقين متعانقين الاثنين
من أجل الحب ضحاو بالعمر
بكات عين كل العاشقين
على اللي دفنو الاثنين فقبر واحد بجنب النهر
وبعد يومين على جنبنا نبتت شجرة
اغصانها متشابكين
رخات ظلها وظلات القبر
وردات اثنين نبتوا متعانقين
باكيين بالعين لونهم أحمر
عصفور أخضر
ف كل فجر يجي يزورنا
يغني حكايتنا ويدعي الله
لينا يغفر

ومع الايام صبحو العشاق
كل جمعة يزوروا الشجرة
يرشوا المقر ما وحنة وزهر
يشعلو شمعة يذرفوا دمعة
يغطيونا بثوب حرير لونو أخضر
ومع الايام صبحت حكايتنا
ترويها العجايز للصبيان
قبل ما تنام يغنيها راوي امام الزمان
بادي الكلام بكان يا ما كان

سمع لاغنية كان يا ماكان بصوت عبد الوهاب الدكالي

عبد الوهاب الدكالي – كان يا ماكان

QR، كود كلمات كان يا ماكان نضم محمد الباتولي

---

اسمع للاغنية