قصيدة الحراز

قصائد الملحون: كلمات قصيدة الحراز

قصائد الملحون	قصيدة الحراز
الكاتب	المكي ابن لقرشي شاعر من ازمور اجزاء موخودة عن جيلالي امتيرد
التاريخ	القرن 19
الرمز المغربي MM	mm3633

1 المقطع

حراز حكيم من الحجاز و طلع للغرب على البراز
قاري جردابية ديال رومان الزرق يا فهيم و ميسر كذا من حكيم قاري علم التنجيم
كيحقه و سجيع و فرصة * ومعلم في حرب النساء * و مبلي بالطاسة
و سالباه الجلسة بين البنات * جايل عنهم طول الحياة * جال مدن و قريات
خاصاه غزالة عنها يدور * فتش المداين و الدشور* يوم وصل الأزمور
صاب بنت ظريفة * عذراء و باهية و لطيفة
في العود كتخبل و تصيح معاه بالحجازي و شغول الشام
صايلة بيهم عن جميع الرّيام * و عيوط الغرب مع الكلام
و بنت اثناشر عام عندها في عمرها * عذراء مخنترة في صغرها
عندي كابرة فالعشرة * و لا تطيق عني صبرة
في كل يوم ما تخطاني
حتى ان جاء الحراز مطّور في البلاد * باعوها له حساد * كيحسدوني في هلال الاعياد
عمل عنها الارصاد في القصر * و سكن بين الواد و البحر
و تملّك بها و ملكاته الغزالة العذرية
حكم عنه مير زينها و ظفر بالحراز * و عمل الارصاد على المجاز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 2

غابت عني تاج الابكار * سبع ايام افقدت الاخبار * صبح عني بشار
جاء و بشرني بخبار الغزال * عند الحكيم آ من تسال
من جانا للغرب بالسحر * رصدها في داخل القصر
مكاته بالزين و الشعر * و الشامة و الخال و الشفر
و الخد العكري بلا عكر * و المعنى فالنقط و الشعر
و انا نطور * قلت له جميع اصحابي طيار * انفرقه عن تاج البكار
انعجب به الا عطات فيه الوجبة بمحاربة
درت خصايل المغاربة * زولت الجلابة
و درت كسوة قاضي * الكتاب دايره في اللبدة
تسبيح في يميني * لحية كسلوك الفضة
وصلت باب القصر نطقوا الارصاد
كيقولوا تجاوب يا حكيم * خرج حراز الريم
قال لي آش عني بيك يا مغربي ؟؟
و نطقت و قلت له : انا قاضي الاسلام. * جيت نستبرك منك يا حكيم
و نطّعمك في حق الكريم * تمشي الى عندي للدار للضيافة * و نطق و قال لي معتزلي
ما نامنشي في بعض السلام * مواكلهم عندي حرام * ما نشرك عندك شي سلام
انت قاضي خداع * روح في حالك صد عليّ
واش القاضي كيكون مثلك جيتي هماز * و طلع للقصر و كنّ باز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 3

حراز مطور بالاشكال * و انا نرجع له بالحيال * صاحب سيدي رحّال
درت عشرة بقطاطي دايرين * و شمعهم مشعولين
و البنادر عشرة متسخنين * و حنايا جدبانين كاملين
وصلنا لباب القصر
نطقوا الارصاد * بداوا كيقولوا تواجب يا حكيم * خرج حراز الريم
كأن جن مطّور * عينيه كيدوروا في راسه زدت ليه * سلّمت عليه غفل
قاع ما رد علي شي سلام * قلت في قلبي ولد الحرام
جدبت عليه و قلت له * قول مرحبا بأهل الكمال
تعرف سيدي رحّال جدنا * و انتايا جتي لغربنا * لازم نوريك سرنا
دخلنا للدار و القصر * و كرمنا بالعود و الزهر
جبنا ليك الخير و الستر * و الظالم ساقر
ليس جاوبني عن هذا القوال * عاد تلفت لي و قال :
نعرف سيدي رحال * حق والي الله بالكمال * ليس نبي و الا مرسال
جبتوا مذهب هذا الحيال * وا نتما يا عشرة طوال
بقطاطيكم كيف الكبال * و حذا عشكم ختال * جابكم انتما للحمية
و دار في الارصاد قال كرموهم بالعكاز * فلت خيّك بين الغراز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 4

حراز قديم رهيب فات * و حكيت فعاله للبنات * قالوا لي الشّيخات :
يالعاشق نمشيوا معاك بالرباعة و اثناعش من البنات * غير الخودات الفايزات
ثلاثة مولوعات * صايلات بنقط الكمنجات
و ثلاثة عوادات * حافظين الالات على الثبات
و ثلاثة طرارات * حافظين قصايدهم و الابيات
و ثلاثة رقصات * كيسلبوا من كان قديم ثبات
و يردوا الشايب للشباب ينسى شيبه * و نطقت قلت ليهم :
هذا هو الدخول * هذه الحيلة هي النزول * قامت البتول
لبستني كسوة ذهب و حرير * و انا باقي زين و صغير
لا لحية لا شارب * كأن عذراء كي هدت للصيام
و فناها الهوى و الغرام * العيون جعب روام * و الخدود و رادة
و الفم كخويتم * و الشفايف لاويين * قومان بحبي كاويين
و التحليقة جمعت المطاوي * تلحفت بحايك المحربل
قالوا البنات * يالشيخة زيدي قدامنا * سميناك أمي يامنة
درجوا البنات * و جات لالة مليكة *هي و خيتها فطومة
و الريم حادة و السعدية * و الغزال زهرة و عبوش و راضية
و منانة و الزاهية * رحيمة و خديجة
و لالة حبيبة هذو اثناعش * درجوا بشرابل و القماش * و المعون مقوّم
كل عذراء نحكيها شي غزالة * كتجرح من شوف النجال * و القصة يا علال
بعد زدت انايا قدامهم * نطقوا الارصاد بداوا كيقولوا :
تواجب يا حكيم * خرج حراز الريم * شافنا بندقنا له بالجميع
و دويت انا دغية معاه * طلبته ضيف الله * قال لي: منين انتم ؟؟
قلت له جينا لك من فاس * يا حكيم انت عز الناس
جبت لك رباعة للوناس * للزهو و النقط مع الكاس
جبت لك رباعة للوناس * للزهو و السلوان معاك في القصر
و الظالم ساقر * كيمسّق فيا * و نشوف فيه يضحك و انا فرحان
قلت غادي ندخل *دوى و قال ليّ * فين يا الشيخة ؟؟؟ * قلت له انا هي يا حكيم
قال : انت حصلة * و جاية لعندي بمحلة
روحي شوفي شي قشلة تبيتك * يا بنت الزغبية
انتي و اثناعش يخصكم طباخ و خباز * روحوا للحارة ذا اقراز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 5

بقيت نخمم يا فهيم * باش نولي عند الحكيم
هندسته و جبرته رهيب حايل * مطور بالاشكال * قلت أراسي العبيد
كينفعوا في الحزة غير زيد *جرب فالك إلا هو سعيد
و زدت اثناعش من العبيد *و زدت اثناعش من الخدم * قلت ليهم آ العبيد
دردبة في القصبة عند الحكيم * قالوا لي نمشيوا غير قوّم راسك
دويت قلت لهم درت المسّوس * و البسيسة و الزمّيتة
و درت دغنو و جبابن دا الحليب * صنعت الميدة بالودع * درت كساوي الملوك
و الطّبيقة و حكوكات البخور* قوّمت قناوي في الظهور
بالقرقابات و قنقات * يطلقوا شي مايات * و الخدم يجدبوا
و طبول كترعد وصلنا للقصر * نطقوا الارصاد بداوا كيقولوا
تجاوب يا حكيم * خرج حراز الريم
شافنا و بدا يضحك قال زيد * لاش قدمتوا ها يا العبيد
زدت انايا عنده و بست يده * و نطقت وقلت له : أنا عزي بالخير
جيت عنك صليح بلادنا * و قالوا لك سيادنا * دارك محسوبة دارنا
دخل هذي الميدة لآلة * و طلعها يا حكيم
فرح بنا العبيد * ما عليهم حجــبة * خدامين ناس الرحبة
دوى وقال لي يا تريكة حام * ليس فيكم صالح
العبد إلا يشبع يولي يفسق * و الا يجوع يولي يسرق
منكم جميع الأذية * لو صبتوا الاحكام
كلكم تتحرقوا بالقاز * ذهبوا يا شبيهات المعاز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 6

وليت لعنده يا رسيخ * غير بوحدي لكن شيخ
معايا هجهوجي متحفه بهجاوي * بلغة مفرقة و الخيط على الراس
و التعكريطة و الخنجر* والحيالة والجهد مع الصّغر* نصرته في باب القصر
نطقت بسرّابة مع القصيدة نطقوا الارصاد * كيقولوا تواجب يا حكيم * خرج حراز الريم
ناضت عويشة تبعاته * منين سمعوا صوتي وقفوا بزوج * غنيت ليه و صرت كنقرح
نسمع فيها تقل له:هذا شيخ اديب *يا حجازي دبا يدخل * ما تزيد علي حتى كلام
يفرجنا هذا النهار * قال لها يا سود الشفار * ما نامن فيه يشوف في خيالك
مايدخل للقصر * قالت له تسمع يا حبر
احنا في الغرب الشيخ و النساء * خاوة في الجلسة
لا تخشب عنه * اخرج قل له مرحبا * رمات على الذيب الخشبة * و حنى قفاه
خرج العندي و انا كنقرح * حتى كملت القصيدة
من سبعة دا القسام * و زاد سبقني للسلام
زيد مرحبا بيك آ الشيخ * زيد بيك مرحبا * كونت عنها في الحسبة * دخلنا القبة شلاّ نوصف
صنعة الحكمة ها يافهيم *انا وغزالي و الحكيم
مسقي في دوى وقال لي * كب و دندن يا مغربي
و رفدت القمبري و صرت نقرح * و نقول في القصيدة باللغوز
آ باشا العوارم كيف المعمول * كتجاوبني في الغنة
تقول لي يا قرصي * دبا نريك باش تسّمش
حتى بغات و رشق ليها * سوات العود في يديها
و بدات ك تخبل و تطيح عليه * بالتواشي و تطيب فيه باللطافة
رمات يديها لجيبه * جبدت الخاتم و الطاسة و قضيب الرّصد
طارت لذيك الجهة يا فهيم * قالت اسمع يا حكيم :
هذا هو محبوب خاطري * و انت عذبتيه * آ الظالم كي نعمل بيك ؟؟
ها حكمتك حصلت في يديّا * دبا و لّي قرد زيد فرجنا بالتنقاز * و شطحاته بقضيب تاز

اللّازمة

آ من هو يصغى ليّ * كيف جرى بين العشيق و عويشة و الحراز * حراز حكيم من الحجاز

المقطع 7

رداته قرد مجادبي * قالت لي يا طالبي
هذا هو العدو اللي فرقنا هذي عشرين يوم * هاني حصلته ليك
واش صافي شغلي و الا لا * قلت برافو يا لآلة
قالت لي يا الحبيب * ها الخاتم و الطاسة و القضيب
اقعد نزهاو بزوج في القصر* و الحراز يشوف بالنظر
و معاه ندبر * يا حبيب الخاطر
و ذوك التواشي باش قدّمتي عندنا * كيف تواشي حافين
لو جيتي شيخ اديب * كيف دبا يكون دخلتي للقصر * تظفر بي ياالشيخ
قلت لها هذا ما كتاب * صح ليك ا بنت الصواب * اسمعي مني الخطاب
حرمة خدودك يا سود النجال * زاوقت في السالف و الدلال * العفة للرجال
هذا الحراز رجعيه ابن آدم * و آذني للعفريت يشيله للحجاز
يديه لامه تقفزه و تعلمه و الحكمة عند النساء * قالت لي علّ وعسى
ما نفعل الا ما تريد * ضربت الطاس بالقضيب * طلع عفريت ازرق
قال لها آذني لي يا الغزال * قالت هذا الحراز عذبه * اديه للحجاز سيبه
شيله يا عفريت يمشي لباباه يعلمه التقراز * و الحراز مشى للحجاز
قلت لها اسمعي لي * انت اللي حاكمة و فايزة يا عينين الباز
من دون مزاح و لا طناز * لا تعمل فنطازية * وعزل الخلطة المخلطة
بثّمار مع الغاز* ياو الخنزير مع المعاز * و المولى يسمح لي
ما شفت غزالة و لا ضاربة مع الحراز * و مانحملشي قوم الدباز
غير فراجة و سجية * قال المكي جول في اللغا
يا فاهم الارماز * الغي و فارق قوم الدراز