ابن بطوطة
بن بطوطة وسميتو لاصلية، مُحَمَّدٌ بْنُ عَبْدِ ٱللّٰهِ بْنُ مُحَمَّدٍ ٱللَّوَاتِي ٱلطَّنْجِي. رحالة وجوال مغربي او كبير الرحالة في عصرو ودابا، تولد بمدينة طنجة ف 24 فبراير 1302 وتوفى رحمه الله فعام 1377. ملي كمل 22 عام، خرج بن بطوطة قاصد يمشي لحج وفنيتو يجول لعالم يفوت لحج لهيه شرق وغرب وجنوب وشمال. وبن بطوطة كان قاري ومتعلم، وهكدا خلا باه ومو وقصد بنية لحج يلتحق بشي قافلة لي غادة فلاتجاه لي هو غادي ليه. وهكدا التحق بقافلة غادة لتونس من تلمسان بما يسمى لجزائر حاليا، ومنها اليبيا ولاسكندرية بمصر والقاهرة. بن بطوطة تفصل عل القافلة وفضل يشد طريق النيل الجنوب لمصري ويقطع لبحر لاحمر للحج فالسعودية حاليا. وهبط مع النيل تا الجنوب فطريق مامتعوداش للحجاج حيث الطريق الطبيعية كانو يقطعو من فصر عل فلسطين وسوريا ومنها للحجاز. من زهر بن بطوطة ملي وصل الجنوب لمصري فين يمكن يشد لباخرة لي تقطعو البحر لاحمر الحجاز، تعلنات تورة ضج المامليك فمصر فديك لمنطقة وكل السفن والبواخر لقاهوم ماخدامينش، وكان عليه يرجع لمصر ومنها لسوريا فالحجاز، فين غادي يحج المرة اللولة.
من بعد لحج طلع ضرب دورة فجهة العراق وايران حاليا ولعام لاخور رجع حج تاني مرة اخرا. سلا لحج تاني وجمعو حوايجو وهبط لجهة اليمن فين غايشد الباخرة لي تقطعة لجيبوتي حاليا وغادي يهبط لجهة الشرقية دالقارة لافريقية تا الموزمبيق. من بعدها رجع فنيتو يمشي الهند، ولكن كيديما عوض ياخد باخرة لي تتمشي من بحر العرب الهند، فضل بن بطوطة يشد الطريق الطويلة ، وعلاش اللا؟ حيث غايطلع عل تركيا واوكرانيا وروسيا الحالين ومنهم لافغانستان وباكستان باش يوصل للهند. لهند لي غادي يستقر فيها لمدة 10 سنين فين كان تيمارس القضاء. لمدة لي بقاها فالهند ماشي حبا فالهند ولكن خوف من حاكم الهند لي كان عندوو السلام والقتل بحال بحال. تاجاتو الفرصة باش يخرج من الهند فين عينو حاكم الهند يكون رسول ديالو للصين ويدي هدية لحاكم الصين. طبعا بن بطوطة لي مامولفش يسخن بلاصتو، جاتو من الجنة والناس، وفعلا تكلف يقوم بالمهمة. تا هادي ماكانتش مكتابة ليه، ربما شدوه رجال لبلاد دالهند، فالوقت لي بغاو يمشيو للصين جات عاصفة هرسات الباخرة والهدايا لي كان غادي بيهوم للصين وتعرضو ليهوم قطاع طرق وشفارة واحتجزوه شي مدة تا طلق صراحو شي حد ومن تما قصد الصين، مادام بن بطوطة ممسخرشي القايد، الطريق للصين معروفة، علاش اللا مايدوش عل سريلانكا ومنها لجز المالديف ومنها لاندونسيا ومن بعد الصين راها فبلاصتها تتسناه، داكشي لي كان لا زربة عل صلاح.
لجميل فالرحلة دبن بطوطة انو ماكانش تاجر غادي يقلب عل لاتمنة دالمواد لي يشريهوم ويبيعهوم، بن بطوطة كان تيدون ويحفض ويتدوق ويعاشر الناس ويتزوج، فالمدة دالرحالة ديالو رصد جميع اشكال الحياة دالقوم لي داز عليهوم، وسجل عاداتهوم ولباسهوم وماكلتهوم وعلاقتهوم لاجتماعية، هدا لي خلا الرحلة ديالو تكون اكتشافية واجتماعية وبمكن تقول تا انتربولوجية ولي استعملوها الغرب وتدرسات فجامعات غربية، عل عكس ماركو بولو لي مشا مع مجموعة تيقلب فاتمنة المواد ورجع بحالاتو او كيف تيقولو رحلة ماركو بول مقارنة مع رحلة بن بطوطة، ماركو بولو كان غا تيدور فجردة ماشي رحلة، لموهيم من بعد مازار وتسارا الصين ووصل تا لشمال الصين، فكر يرجع بحالاتو توحش لبلاد، وهكدا شد الطريق العكسي وداز حج مرة اخرى ورجع لطنجة فين غا يعرف بلي باه ومو ماتو، ترحم عليهوم وشد الطريق تاني للاندلس او ماتبقى من لاندلس غرناطة فين غايلقى مرض الطاعون وغايرجع بحالتو لمغرب ومنها تاني غا يشد الطريق لحنوب فين غا يمشي لموريتانيا ومالي حاليا، قبل ما يعيط عليه سلطان فاس المريني يرجع لفاس باش يدون الرحلة ديالو ولي غايتكلف ابن الجوزي بالصياغة ديالها.
وبن بطوطة تيتعتبر من شيوخ و ملوك الرحلة والتجوال فالعالم لحد لان، فبن بطوطة قطع كتر من 75 الف كلم من غرب تا لشرق الكرة لارضية لمعروفة فداك الوقت. رحمه الله توفي فعلم 1377 م
ورقة تقنية عل بن بطوطة
الدول لي زارها بن بطوطة
شمال افريقا
الدولة | المدن |
---|---|
لمغرب | طنجة، شفشاون، فاس |
موريتانيا | ولاته |
دزاير | تلمسان، مليانة، بجاية |
تونس | تونس، صفاقس، سوسة، قابس |
ليبيا | طرابلس، برقة |
مصر | الإسكندرية، دمنهور، دمياط، سمنود، القاهرة، صعيد مصر ومدنه |
الشام
الدولة | المدن |
---|---|
سوريا | دمشق، اللاذقية، حمص |
فلسطين | القدس، بيت لحم، غزة |
الأردن | عجلون، الكرك |
لبنان | بيروت |
الجزيرة لعربية
الدولة | المدن |
---|---|
السعودية | جدة، مكة، المدينة المنورة، رابغ، حلي، بدر |
عمان | ولاية نزوى، ظفار |
العراق | بغداد، الموصل |
اليمن | زبيد، تعز |
شرق افريقيا
الدولة | المدن |
---|---|
الثومال | موقاديشو |
كينيا | مومباسا |
تانزانيا | زينزيبار |
اسيا
الدولة | المدن |
---|---|
أوزبكستان | خوارزم |
تركمانستان | |
كازاخستان | |
إيران | خراسان |
أفغانستان | كابول |
باكستان | البنجاب (باكستان) |
الهند | دلهي |
إندونيسيا | سومطرة |
ميانمار | |
سريلانكا | |
جزر المالديف | |
الصين |
QR، كود بن بطوطة
QR، كود بن بطوطة |
قم بكتابة اول تعليق