ههههه، نفس السؤال تقدر تسولو .. واش كاينة لفلوس فالبني، واش كاينة لفلوس فتاكزارت، فالجوطية، فالتعليم، فالحوانت …. السؤال الصحيح واش عندك الامكانيات والقدرة والفهامة والمعرفة والوسائل باش ادير لفلوس فاي ميدان ومجال …!! بزاف تيسولو عل الفوريكس وكيفاش ادير لفلوس فالفوريكس او الاتجار فبيع العملة … وبزاف هوم تيناقشو القضية ومن نيتهوم. غا حيث العملية اون لاين وعندك كونييكسيون انترنيت غاتولي تتاجر فالعملة انا بعدا تنحشم ملي تنشوف شي واحد تيسول وتيناقش الاتجار فالعملة وهو عمرو ما باع تا بيضة او ربطة دالقزبور بقات غا العملة. غا حيث واحد الهصلاص تيتسغل الغفلة دالناس وتقتهوم فيه ويضل يبارطاجي ليهوم الروابط باش يتاجرو فالعملة حيث هو تيربح ماشي من الاتجار فالعملة … لا من تاقواديت تيقود الناس باش يتاجرو فالعملة وتاياخود قيمة عل كل راس تسجل تتراوح مابين 100 و 300 دولار للراس هدا تيدير لفلوس ولكن ماشي بالفوريكس بتاقواديت والاستغلال وتبياع لعجل والغفلة لانترنيت مازال مامقننش. طبعا من حقو يدير الاشهار ويربح من لكوانب والطماعة والمغفلين غا من باب الاحترام تيخصو ييعلمك بلي راه تيغتفلك ويقلك راه لتسجلتي غا نربح عل كرك 100 او 300 دولار وراه ممكن او اكيد غا تخسر فلوسك. لان البيع والشرا فالعملة عندو الناس ديالو لي متبعين العملة متبعين الاحداث السياسية والاقتصادية وختى احوال الطقس لي تقدر تاثر عل الاتمنة شي تسونامي فالصين او الجابون يطيح الين . العملة تقدر تغير غا حيث داك لهبيل دالرئيس دكوريا الشمالية مشا تيلعب بشي صاروخ او لهبيل دترامب كتب شي ميساج فتويتر، او بوتين عطس فسيبيريا .. باش تاجر بالعملة خصك تكون ملم بالمهنة كيفما مايمكنش تولي آرشيتيكت او انجينيور او معلم او استاد او دير فراشة فالسويقة او تسرح لغنم فقط حيث عندك كونيكسيون لانترنيت نفس الشئ فالفوريكس … سي عبد اللطيف لجواهري مدير بنك المغرب حياتو كاملة تيحسب فالفلوس دالمغرب كامل وربما تا افريقيا راسو شاب وحجبانو تقرنو وملي وصلات القضية لتعويم الدرهم يعني البيع والشرا ددرهم 10 سنين وهو تيفكر وماقدرش يعومو دار ليه غا بانيو صغير وبنوات وجانطات غا باش يفزك ومن بعد عام حبس المرقة وقالك الدرهم مازال مامستعد يعوم وانت باغي تعوم الدولار والدرهم والين والاورو والوقية .. من نهارك ويشيط ليك الربح غا لكنتي وجهك قاصح. باش ماتفهموش غلط كاينة لفلوس فالفوريكس ولكن للناس لي مختصين فيها ولي تيربحو زبابل دالفلوس حيث كاينين لكوانب لي تيخسرو ولماكانوش لكوانب راه تاهوم ماغايربحوش هو ماشي ربح هي غا لفلوس تتمشي من واحد ماعرفش وطامع يربح الواحد فاهم اللعب بحال لقمر. الا 10 دالناس كلها دا معاه مليون ومشاو لشي دار ايقمرو ملي يفرقو الجقلة غا يكون واحد رابح او جوج والخرين خاسرين والقيمة دالربح للي ربحو هي شحال خسرو لخرين حيث داك الوكر دالقمر دخلات ليها 10 دالمليون هي لي غاتبقا قانون الفزياء د لافوازي تا حاجة ماتتزاد وتاحاجة ماتتنقص فقط تتحول يعني لفلوس تحولات من واحد او وحدين لللاخرين.. ربطت الفوريكس بالقمر غا باش يتفهم اللعب ماشي باش نعطيها صبغة دينية ونحرمو .. لا ماشي حرام هو بيع وشرا لي حرام هو لي تيطمعك ويرويك الربيع ومايوريك الحافة باش يربح عل ظهرك هدا هو لحرام الوحيد فهاد العملية يستغل الشوق ديالك الفلوس ويوريك خلا دار بوك باش يصفيها ليك بخطرة … ولي نورمالمو هاد العملية خص القانون ايعاقب عليها حيث تتدخل فالتدليس والغش والاحتيال. طبعا من غير لعلمك وقالك مرة خرا بلي راه تيربح من وراك وتبيعك لشركة وبلي هو راه ماتايتجرش فيها وانما غا باغي ايزرفك .. لعلمك فهاد الحالة تتولي انت مسؤول عل كرك وعل خسارتك. نرجعو القمر .. قلنا القمارة تيمشيو لشي دار مستقلة فين ايقمرو حيث واحد ماغايتق فلاخور يمشيو لدارو ايخافو ليجيو نسابو وخوتو ويسرقوهوم .. هنا تيجي الطرف التالت مول الدار فين تيقمرو لي تيوفر ليهوم الجو ويصايب ليهوم لبرارد داتاي وغريبة فابور والعسة ويحميهوم باش يقمؤو قخاطرهوم مقابل واحد النسبة من لاروسيت 5 فالمية من الروسيتة .. الفوريكس الشركة بحالها بحال مول دار لقمر الشركة رابحة 5 فالمية ديما ماتيهمهاش شكون ربح او شكون خسر .. وباش الشركة تبقا تربح خصها كليان لي هوم القمارة فحالة مول الدار والمتاجرين بالعملة فحالة الفوريكس .. حيث بلا كليان ماغايديرو والو داكشي علاش تيفرقو الحلوة فحالة مول الدار او برمات تيعطيك واحد 100 او 200 دولار فابور تبيع وتشري بيها عل ماتنشب فحالة الفوريكس او تيخلص ناس لي يجيبو ليه الكليان او يقود ليه القمارة قحالة مول دار لقمر … فهمتي هادشي … ومازال غاتسول عل الفوريكس الله ايعاونك ويزيد فرزقك … الموهيم سير شري السلعة من درب عمر ودير فراشة وبيع التقاشر احسن ليك من الفوريكس حيث التقاشر عندهوم قيمة عينية مضمونة كاع لمتباعوش لبسهوم. ولا شي حد عطاك شي رابط باش تتاجر فالعملة قليه ايوريك كيفاش هو تيتاجر فيها وشحال ربح ما يدخلكوم بديك خوتي لمغاربة .. آخوتي .. عرف بلي باغي يفدلكل … وتيرطبها ليك …
الموهيم غا لمكنتيش تتحشم انت عمرها تجمعات ليك 1000 درهم عمرك بعتي تا تقشيرة وتظن بلي ممكن تربح من التجار فالعملة .. غا حيث شي احد جار فيديو فالك ولات عندي طونوبيل وسكوتر ودار من الاتجار فالعملة تا نت تيق وتنوض ديرها ربما واحد صدقات ليه بحال لقمر .. ولكن كاينين 10 الالاف خسرو بالرياضيات مرة اخرى احتما تربح هي 1 من 10 الالاف .. وكلامنا مشا مع الريح …
قم بكتابة اول تعليق