بيتكون

عملة البيتكون

البيتكون بالنگليزية Bitcoin وتيترمز ليه ب BTC او مختصر ب ₿ حرف ب فالنگليزية وفيه جوج شرطات عل شكل شرطات الدولار. البيتكون هو عملة الكترونية ونظام دالخلاص عالمي مامرتبط تابشي دولة وماموجودش عل شكل عملة دالمعدن او لوراق.

ظهرات هاد العملة فعام 2009 وقليل الدول لي معترفة بها وربما فهاد لوقيت لي تيتعاملو بها قانونيا وسط بلاد هي المانيا، ما باقي الدول واخا تتسمح بستعمالها تا بانكة مامرتبطة بها. وتتستعمل فقط اون لاين، حاليا بداو يظهرو ماكينات ATM فشي دول فين يمكن ليك تشري او تصرف البيتكون لكاش. لي خرج هاد العملة لحد الان مازال مجهول فقط معروف بسمية ساتوشي ناكاموتو ولي كان علن عل هاد العملة عل شكل بحث ف 2008.

باش تستعمل هاد العملة تيخصك دير حساب تيتسمى واليت او بزطام بالمغربية، كاينين شركات لي تيقدمو هاد الخدمة، خدمة البزطام فيت تتجمع فلوسك وطبعا حساب فالموقع دالبيتكون. البزطام ديالك الالكتروني غا يكون فالكومبيوتر او التيليفون ليدرتي فيه لحساب وتيخصك ماضيعوش والا لضاع ليك بحال لضاع ليك بزطامك دالجلد، والاساسي لي ماخصوش ايضيع هو الباسوورد او المفتاح لي تيسمح ليك باش تستعمل حسابك.

بيتكوين
Bitcoin


البلد	دولي
تاريخ الإصدار	03/01/2009
رمز العملة	XBT، BTC، ฿ ا لوحدات: ملي بيتكوين – mBTC ميكرو بيتكوين – μBTC ساتوشي – Satoshi
رمز الأيزو 4217	XBT
موقع المصرف المركزي	عملة لا مركزية
سعر الصرف	15.369 دولار “09/11/2020”
الرمز المغربي MM	mm4855

كيفاش تحصل عل البيتكون؟

باش تحصل عل البيتكون، يا إما تتشريه، كاينين بزاف دالشركات لي تيبيعوه او من خلال برصات فين يمكن تبيع وتشري البيتكون، او من خلال لي تيتسمى تعدين البيتكون. باش ماتمشيش غالط التعدين ماشي مقصود بها معدن وتصايبو منها، لمصطلح تيتستعمل غا بالقياس عل تعدين دالفلوس. فالتعدين دالبيتكون تيكون بالكومبيوتر وتهاكي الكود، البتكونات لي كاينين فالعالم كامل هو 21 مليون بيتكون، هاد العدد ماغايتزاش نهار البيتكونات كامليت يتكتاشفو، لحد الان يالله 18.355.100 بيتكون لي متكتاشفة والباقي مازال مامكتاشفش، هدا علاش تيدار تعدين باش تكتاشف بيتكونات جديدة باستعمال كومبيوترات قوية لي تقدر تخليك تهاكي سلسلة وملي تتهاكا شي سلسلة لي وصل ليها تاياخود 12.5 بيتكون. غا هي باش توصل ليها خاص تجهيزات وكومبيترات عندها بروسيسور وفيديو كارد قوية وتتكلف وقت باش تفك الشفرة وخاصة من بعد 2016 ملي زادو صعبو الكود. طبعا اي واحد يمكن ليه يعدن البيتكون لعندو الامكانيات. كيفما قلت من قبل 2016 كان بالامكان تا بكومبيوتر شوية مقاد تعدن وتقدر توصل الكود من بعد مدة طبعا تتفوت ال 5 سنين. حاليا فقط الشركات لكبار لي يقدرو ايديرو هادشي او كاينين لي تيتجمعو فمجموعات وتبساهمو بيناتهوم وتيتقاسمو داكشي لي وصلو ليه.

نوع من التجهيزات الحالية لي تدير لحسابات باش توصل الكود، فقط باش تاخود فكرة عل الصعوبة

هدا ماتيعنش ان البيتكون مستحيل توصل ليه بالنسبة للناس لي عندها امكانيات وصبر، كاينين شركات لي تيكريو سرفرات او كومبيوترات باش تستعملهوم فالتقلاب او ممكن تنظم لشي مجموعة او كيف تيتسماو مسبح التعدين لي تتقلب او تتعدن البيتكون.

والطريقة الساهلة كاينين شركات لي تيكريو منك كومبيوترك اوتيليفونك يستعملو جزء منو باش ايقلبو عل البيتكون وتيدورو معاك، طبعا التدويرة عل حساب شحال دالعمليات تايديرو بكومبيوترك والقوة دالكومبيوتر ديالك. هو برنامج او متصفح براوزر تيخدم مع قوقل كروم ملي تتحلو تيستعمل جزء من البروسيسور ديالك باش ايدير لحسابا لفك الشفرة، يعني وانت تتستعمل الكومبيوتر ديالك فخدمتك فايسبوك او يوتيوب او اي حاجة تدير شغلك هداك البرنامج تيستغل جرز من الكومبيوتر وتيدير حساباتو. هادي اي واحد يمكن ليه يستعملها غا هي ماشي شي حاجة كبيرة بحكم الجهد دالكومبيوترديالك يعني تقدر تجيك ما قيمتو 5 دولار فالشهر بكومبيوتر مطحطح او شي 1 او 2 فالهنار لكان كومبيوتر واعر دبصح ماشي جاركوم لفهايمي قاليك كومبيوتر واعر وتيقتيه. المهم تتبقى فلوس حسن من والو لي تيعطيك قوقل او انترنيت اكسبلورر ملي تتستعملو. هاد البرنامج لي دويت عليه فاللخر سميتو كريبتوطاب واي واحد يمكن ليه يانسطالية فكومبيوتر او تيليفون او كومبيوترات. ماحد الكومبيوتر شاعل والطاب محلولة راه تادخل فلوس، واخا قليلة. المهم البرنامج فابور لبغيتي غا تجرب تانتا يكون عندك بيتكون ولو غا 10 ددراهم.

QR، كود البيتكون