شناهو عنوان آي بي او عنوان IP وعلاش الكونيكسيون تتكون تقيلة شي مرات.







بشكل بسيط عنوان الاي بي هو بحال رقم دالتيليفون، الشركات دالاتصالات تيعطيو لكل واحد رقم دالتليفون باش ملي تايتصل او تتجيه مكالمة السيستم تيحول المكالمة لداك الرقم. الاي بي نفس الشئ كل كونيكسيون دلانترنيت تتكون عندها رقم تيخليها تعرف من خارجة وفين غادة. غا تساءل علاش الاتصالات ماتتعطيكش النمرة. تما كااينة القضية الاتصالات تيكون عندها واحد العدد دالارقام تيتسماو آي بي ادرييس بيبليك عمومية من الرقم القلاني للرقم لقلاني تتفرقهوم عل الكليان اوتوماتيكيا من غير لكانت عندك اي بي static تابتة وهاد القضية غالبا تتعطى غا للشركات طبعا تتخلص عليها تمن زايد تقدر تشري 2 او 4 او 8 .. دالعناوين آي بي. قالنا هادو غالبا للشركات. اما الاتصالات للديور والسكن فغالبا تتكون متغيرة. قبل مانكملو الاي بي كاينين جوج انواع لقديم لي تيتسمى IPv4 والجديد لي سميتو IPv6. لقديم تقريبا وصل الحد الاقصى واغلب الشركات ولاو ايخدمو او تيدخلو تا النوع التاني فانتظار تولي غا IPv6. ملي تدارت IPV4 ماكانوش يظنو ان العدد غا يوصل لنهاية مع حجم الاتصالات لي كانت داك الوقت ولكن مع المواقع وعدد المشتركين والتيليفونات لي ظهرو مؤخرا كتر الطلب عل الاييات. المهم الموشكيل مابقاش مطروح مع الاي بي v6 لان الاحتمالات لا منتهية “ماشي بالمعنى الحرفي دالكلمة” هدا كان توضيح فقط، نرجعو القضية كيفاش شركات الاتصالات تيفرقو عناوين الاي بي عل الزبناء لان غالبا عدد الاي بي لي متوفر لشركة اتصالات تيكون قل من عدد المنخرطين باش تتوفر شوية دالفلوس حيث الاي بي مكلفين وتيتكراو شهريا او سنويا وكل شركة تيكون عندها واحد العدد. فشركة الاتصالات تتلعب عل قضية ان ماشي جميع المنخرطين غا يتكونيكتاو فنفس الوقت تتاوبتيميزي واحد العدد دالعناوين لي تتبفا توزعو عل الكليان لي مكونكتين فنفس اللحضة. غا تساءل واش غا يوقع الا الكليان كاملين تكونيكتاو فنفس الوقت والعدد دالعناوين ناقص. من قبل او شحال هدا الشركة لشي واحد تكونيكتا وكانو العناوين كلها عامرة، تتشوف شي واحد لي الكونيكسيون ديالو ماشي اكتيف لمدة طويلة وتديكونيكتيه وتعطي العنوان ديالو لهاداك لي يالله تكونيكتا فاانتظار واحد اخور يخرج وتدوز الكونيكسيون من داك العنوان الواحد آخور. قلنا هادشي كان شحال هدا، دابا ولات تيكنولوجيا جديدة لي تتسما NAT او Network address translation

كيفاش تيخدم النات

هاد اللعيبة تدير خدمة اوتوماتيك وتتعطي عنوان اي بي لكثر من كليان لكان عندهوم خصاص فالعناوين والعدد لي متصلين تيفوق العدد دالعناوين لي متوفرين. فهمتي شي حاجة؟ عقتي شنو واقع؟ هدا علاش شي مرة تتلقى لانترنيت تقيل لان انت وجارك او حد خور من درب خور تتشاركو فنفس العنوان وديك البركة دالكونيكسيون تيقسموها بيناتكوم بسرعة كبيرة الف جزء من التانية ماتتحسش بالكونيكسيون تقطعات فالوقت لي تتفرق بينك وبين جارك غا هي تتحس بها تقلية. وكلما العنوان تقسم عل عدد كبير من المنخرطين كلما الكونيكسيون كانت تقلية. باش تفهم القضية، بحال الما نهار العيد. المكتب ديال الما داير موتور لي تيدفع الما الاحياء بجهد داير فالاعتبار ان ماشي كلشي غا يحل الروبيني فنفس الوقت. فالايام العادية فينما حليتي الروبيني غا تلقا الما تيشرشر. نهار العيد مع كلشي تيدبح فنفس الوقت وكلشي طالق الما الدرب او المدينة كاملة ديك القوة ددفع لي مديورة عل اساس غا مثلا الف واحد لي غا يشعلو الما فنفس الوقت تتخلي الما ينقص ويقدر يتقطع كاع والا جارك سد الروبيني يقدر يوصلك شوية. ونفس الشئ تينطبق تا عل التيليفونات وديما نهار العيد لي كلشي تيهضر ويبارك فالتيليفون تيكون الزحام عل الخطوط يقدر مايشدش ليك او يدوزك البواط فوكال مباشرة او تسمع غا تيت تيت تيت .. لان تا التيليفونات معمولين عل اساس ماشي كلشي غا يهضر فخطرة.

بصفة عامة هنا تنهضرو عل كيفاش شركات الاتصالات تتخدم وماتنقصدو تا شركة بالضبط.

تعليق الفايس بوك
hespress
Author: hespress

كلشي عل المغرب




About hespress 8478 Articles
كلشي عل المغرب

قم بكتابة اول تعليق

Leave a Reply

لن يتم نشر بريدك الالكتروني في اللعن


*