غرارين عيشة

لمثل لمغربي غرارين عيشة، عيشة طلقات

غرارين عيشة، عيشة طلقات، لاصل دهاد لجملة او لمثلة، تيقولو بلي كانت واحد عيشة فشي درب او حي زوينة، القد والطولة ولعينين ولحجبان وكلشي وداكشي عطية من الله، وكان كل واحد شافها تيبغي يتزوجها، عيشة مابغات تا واحد من هادوك، لا لفقيه، لا لموعليم، لا لگزار، لا مول لفيرمة. واحد نهار جاها واحد عل قد حالو خطبها وبغاتو وتزوجو. ولات عيشة فينما تلاقت شي حد، يزن عليها ومالكي عل حالتك فلان راه باغي يتزوجك، مسكينة، مالك عل هاد لعداب فلان وفلان وفلان باغين يتزوجوك ويبوسو التراب لي تحت رجليك. لموهيم عيشة ماتتتسوقش ليهوم، تتقوليهوم انا مرتاحة مع راجلي. ولكن بياعين لعجل ماعياوش، بقاو عليها تا ولات تشك فلاختيار ديالها وبدا يدخلها لوسواس. لوسواس لي بقا تيتطور ولا حقيقة وتقلبات ولا فالمشاكل مع راجلها وقالتلو طلقني انا عييت من هاد لعيشة دلفقر وقلة الشي. داكشي لي كان، السيد تا هو عيا من الصداع كل نهار تفكرو فالفقر ولحاجة ديالو، قاليها ماخزنت عليك والو، النهار اللول قلتلك بلي راني غا طالب معاشو، ايوا ىآبنت الناس لبغيتي الطلاق نمشيو لقاضي ونطالقو. وداكشي لي كان. طالقو، وداز شهر، داز عام، دازت عشر سنين وعيشة تتسنى ايجي الطبيب ولفقيه والنجار وفلان وفرتلان لي كانو يوقول ليها راهوم غايجيو يخطبوها، تا طار ليها لفريخ ولات تدور فالزناقي وتتقول: آ غرارين عيشة، عيشة راها تطلقات. ومن هنا خرجات هاد لمثلة دغرارين عيشة.

شوف ايضا فيلم غرارين عيشة لعبد الله فركوس واغنية غرارين عيشة للستاتي عبد العزيز.

QR، كود غرارين عيشة

QR، كود غرارين عيشة

Author: hespress

كلشي عل المغرب